Met musiekstyle en – tendense wat konstant verander, vat dit ’n merkwaardige musikant om vanpas te bly vir byna vyf dekades. Afrikaanse musieklegende, Jannie du Toit, is een van daardie kunstenaars wat die toets van tyd kon deurstaan. Hy het homself oor die afgelope paar jaar daarop toegespits om musiek van sy gunsteling musikante, soos Jacques Brel, Jules de Corte, Koos du Plessis en Lucas Maree te sing, maar het besluit dat dit weer tyd is om op sy eerste liefde en passie te fokus – naamlik om Afrikaanse liedjies te skryf en na die verhoog te bring. Die resultaat hiervan, is ’n splinternuwe album: Oesjaar

Die eerste enkelsnit vanaf dié nuwe album, ’n aangrypende liefdesballade – Jy Kyk Sag, is vir sy vrou geskryf – hy en Therina Wentzel is in Junie vanjaar getroud. Jannie noem hy het die liedjie vir haar geskryf en erken dat dit sy persoonlike gunsteling is. Buiten vir die feit dat dit ’n mooi liefdesliedjie is, het dit ook ’n lekker 60’s folk-aanslag, wat dit vandag anders maak as die deursnee. Vriende en aanhangers wat dit al gehoor het, stem saam dat dit dalk mooier is as Jannie se grootste treffer, ’n Liedjie Vir Jou.

Die nuwe album word in November vanjaar vrygestel. Oesjaar is ’n hoogtepunt en viering van agt-en-veertig jaar as ’n Afrikaanse kunstenaar, maar dit bevat slegs materiaal wat hierdie jaar geskryf is. Dit gaan oor wat hy glo, goed waarvoor hy hoop en oor die mense, plekke en dinge wat ’n verskil in sy lewe gemaak het en steeds maak. Hy is vol vertroue dat die eindresultaat nie sal teleurstel nie.

Die nuutste vrystelling spreek ’n wye verskeidenheid temas aan. Daar is ’n huldeblyk aan die oorlede klavierlegende, Christa Steyn, wat vir vyf-en-twintig jaar Jannie se goeie vriendin, begeleier, mede-komponis, musiekverwerker op sy albums en musiekvennoot op wêreldwye reise was. Die titel van die liedjie is die woorde wat Christa self in haar laaste hartroerende televisieonderhoud vir Coenie de Villiers gesê het: Sy Genade Is Genoeg. Koffiekafeetjie is ’n nostalgiese onthouliedjie oor ’n koffiewinkel in Melville wat gereeld in die 1990’s deur kunstenaars besoek is, maar ook oor Badia Isaacs, die dame wat die hart en siel van die plekkie was. Vat Die Pad gaan oor musiekreise saam met Christa, maar ook saam met sy huidige musiekkollegas oor meer onlangse ervarings. Dan is daar Ons Soek ’n Tata, opgedra aan Madiba en op die titelsnit, Oesjaar gebruik Jannie ’n wingerd as beeld van sy musiekloopbaan.

Oesjaar bevat ook ’n paar bonussnitte – van vroeëre liedjies uit sy wingerd, waaronder Karen Zoid se opwindende rockverwerking van ’n Liedjie Vir Jou. Dié liedjie is presies veertig jaar gelede deur Jannie geskryf en dit het vanjaar opslae gemaak nadat Karen en Jannie dit opgeneem het vir haar program, Die Republiek van Zoid Afrika. Binne ’n uur na die uitsending, het dié opname bo-aan iTunes se treffersparade gepronk.

Oesjaar, wat deur die briljante Clinton Zerf verwerk is, sal bekendgestel word tydens twee spesiale vertonings by Mothership Studios in Philadelphia in die Wes-Kaap en by die Atterbury Teater in Pretoria, op onderskeidelik Sondag 11 November 2018 en Dinsdag 13 November 2018. Die album sal, via Vonk Musiek beskikbaar wees op iTunes asook by uitgesoekte musiekwinkels.

Jannie se sololoopbaan het byna ’n leeftyd gelede afgeskop nadat hy sy regs – en taalstudies voltooi het. Gedurende sy studentejare in die 1970’s het hy in ’n pop – en rockgroep gespeel en was ook lid van die Afrikaanse folk-groep, Trilogie, wat reeds op die toetsuitsendings van SATV in 1975 verskyn het. Hy het in 1979 bekendheid verwerf as sanger en liedjieskrywer en het sy eerste solo-album, ’n Liedjie Vir Jou, in 1981 uitgereik. In die tagtigerjare skryf hy musiekblyspele vir Tukkies en in die 90’s bevorder sy JNS Musiek-maatskappy minder kommersiële Suid-Afrikaanse musiek. Hy het in 2008 ’n ere-penning ontvang, asook, onder andere, in 2012 van Innibos Kunstefees, vir sy bydrae tot die Afrikaanse skryfkuns.

Sy mees onlangse projek, voordat hy die uitdaging aangepak het om Oesjaar te skep, was ’n maandlange konsertreeks in België en Nederland in 2017. Intussen gaan sy programme soos Doep Is Nie Dood Nie, Bonjour Monsieur Brel, Kiekies – Lucas se Liedjies en Die eggo van jou Oë voort. In November word sy jaarlikse produksie, In Kersfeestyd, ook weer aangebied.

Om Oesjaar verder bekend te stel, onderneem hy in Desember ’n uitgebreide toer deur die Kaap. Hy sal begelei word deur sy top-ensemble: Susan Mouton op tjello, Chanie Jonker op die klavier en trekklavier, asook Theuns Botha op perkussie.

The post Jannie Du Toit: Oesjaar appeared first on Stage and Screen.

44 jaar op die pad van Afrikaanse musiek het tientalle opnames opgelewer wat sorg dat Jannie du Toit se stem steeds landswyd op radiostasies gehoor word.

Die jongste gunsteling is Gisela de Villiers se aangrypende DIE EGGO VAN JOU OË, wat as titelsnit vir die versamelalbum gekies is. Terwyl sy eie komposisie, ‘N LIEDJIE VIR JOU, sedert 1980 gehoor kan word op alle stasies wat Afrikaanse musiek speel, is daar deur die jare talle ander opnames gemaak waaraan hy ook onthou word: onder andere MADELEINE, GEE ONS VREDE, EENVOUD, SOMERKERSFEES en PIE JESU saam met Coenie de Villiers en Chris Chameleon ‘n paar jaar gelede.

DIE EGGO VAN JOU OË lê klem op die liedjies wat deur die jare speellyste gehaal het, maar daar is ook ‘n paar van die kunstenaar se eie gunstelinge wat dikwels vir fynproewers die naaste aan die hart lê. Daaronder tel VOLGENDE WINTER, IK ZOU WEL EENS WILLEN WETEN, EK WIL VIR JOU, LEEUSPRUIT en AFDRAAIPAD, wat hy saam met Christa Steyn geskryf en opgeneem het.

Jannie du Toit het in die vroeë sewentigerjare as lid van die folk-groep TRILOGIE die eerste keer onder die aandag van Afrikaanse luisteraars gekom. Die groep is in 1973 op Sarel Myburgh se STUDENTEVARIA gehoor en in 1975 kom hulle TV-debuut reeds tydens die toetsuitsendings van die ou SATV. Daarna is hy deel van die Musiek- en Liriekbeweging saam met mense soos Koos Doep, Laurika, Coenie en Anton wat tussen 1979 en 1981 ‘n groot omwenteling in Afrikaanse musiek bewerkstellig het. Hy verlaat die regsberoep en skryf in die vroeë tagtigerjare in diens van Tukkies musiekblyspele vir ‘n studentegroep – onder andere LOELOERAAI en GANSDANS.

Daarna stel Stephan Bouwer hom aan die kabaretverhoog bekend toe hy saam met Laurika Rauch die uiters gewilde VAN BERLYN TOT BAPSFONTEIN aanbied. Hy werk vir 25 jaar saam met Christa Steyn as begeleier, medeskrywer en verwerker, – vanaf 1986 totdat sy in 2011 terminale kanker gediagnoseer is. Hulle tree wêreldwyd in meer as 20 lande op en vier in 2007 hulle 21 jaar van samewerking met die produksie JANNIE EN DIE TANNIE. Benewens talle eie komposisies gee hulle baie aandag aan Nederlandse musiek, asook aan die musiek van Koos du Plessis. Jannie se mees onlangse sukses is met DOEP IS NIE DOOD NIE, waarmee Koos se afsterwe van 30 jaar gelede herdenk word. Die program sal binnekort deur KykNet uitgesaai word nadat daar in ‘n jaar se tyd meer as 90 optredes landswyd was.

Op die oomblik is hy ook nog saam met die tjellis Susan Mouton in HARTSNAAR op die verhoog te sien en saam met Lochner de Kock in ‘n kosprogram, DIE CORDON BROERS SE KOSSÊRT, wat vanjaar ‘n draai by Innibos maak.

Jannie het die Innibos Lewenslange Toekenning vir 2012 ontvang en dit is dus heel gepas dat hy by dié Fees sy nuwe album vrystel. Dit word beplan vir 18h00 op Donderdag 2 Julie wanneer hy by die “LEGENDES-AAND” op die hoofverhoog optree saam met ou vriende soos Sonja, Rina, Laurika en Anton. Al die liedjies wat hy daardie aand gaan sing kan natuurlik op die nuwe vrystelling gehoor word.

DIE EGGO VAN JOU OË word deur JNS Musiek vrygestel en deur REAL Music in die handel versprei. Die album is reeds vanaf 25 Junie landswyd in beskikbaar.

The post Jannie du Toit appeared first on Stage and Screen.