Alles Malan

Begin Dinsdag 9 Julie 20:00.

Alles Malan is ’n familiedrama wat in die Paarl buite Kaapstad afspeel. Aan die hoof van die familie staan Derik en Brenda Malan. Hulle eersgeborene, Frik, keer na agt jaar in Engeland terug om die familiebesigheid, Malan Vervoer, by sy pa oor te neem. Sy vrou, Tessa, en twee tienerkinders keer saam met hom terug, maar het elkeen ’n stryd van hul eie:

Tessa moet weer gewoond daaraan raak om ’n huisvrou te wees. Die 17-jarige Elani ontvang lewensveranderende nuus en Freek, die Malans se 14-jarige aangenome seun, worstel met ras-identiteit. Nico, die jongste van die Malan-seuns, staan op trou met Lee-Ann. Die rol van oupagrootjie Peet word deur Marius Weyers vertolk.

Genrè: Drama

Stêrre te sien: Nadia Valvekens, Ivan Zimmerman, Elsabé Daneel, Albert Maritz, Matheo Olivier, Nicole Fortuin, Greteli Fincham, Sean Marco Vorster en Marius Weyers.

Kanaal: kykNET

[divider]

Lui maar op, Belinda

Begin Maandag 8 Julie 20:00.

Ian en Ander is ’n klein hoekwinkeltjie in George en behoort aan Ian Jantjies, ’n middeljarige man wat die gejaag van die groot stad vir die vrede van ’n kleiner dorp verruil het. Maar vrede is daar nie, want die drie ouer mense wat vir hom werk, maak hom grys.

Belinda Swanepoel, ’n eertydse Afrikaanse aktrise, is meer voor haar spieëltjie as voor haar kasregister en Annetjie Nel, ’n militaristiese en konserwatiewe bakster, bemoei haar meer met die winkel se sake as met die koek van die dag. Dan is daar die arme, sjarmante boereheld Frans Wessels, wat die vrede tussen Annetjie en Belinda probeer bewaar, maar selde daarin slaag.

Die reeks skop af met ’n nuwe aanstelling, die jong bleeksiel Dirkie, wat skielik hoof van sekuriteit word. Dan kom steek Maggie, Ian se vrou, ook nog haar neus in haar man se sake. Saam moet hulle die uitdagings van die ouderdom die hoof bied, maar leer ook dat die lewe vol tweede kanse is en dat ’n mens nooit te oud is om pret te hê nie.

Genrè: Komedie

Stêrre te sien: Brümilda van Rensburg, Annelisa Weiland, Eric Nobbs, Duncan Johnson, Carmen Maarman en Wian Taljaard.

Kanaal: kykNET

[divider]

Kokkedoor S03

Begin Donderdag 18 Julie 20:00.

Wie sal ooit vir Tannie Poppie vergeet? Of Tiaan en Mynhardt se ongelooflike skeppings? Tannie Skuinskoek en Magda se sêgoed? Johnny en Elsa se innoverende spyskaarte?

Ná twee gewilde seisoene van Koekedoor asook Kokkedoortjie en Koekedoortjie, keer Kokkedoor wéér terug na kykNET. En, dié keer trek die reeks ’n byderwetse stadsbaadjie aan. Vir Kokkedoor 3 soek kykNET weer na die perfekte kombinasie van onthoukok en kinkelkok.

Genrè: Realiteit

Stêrre te sien: Hetta van Deventer-Terblanche, Nic van Wyk en Sam Woulidge.

Kanaal: kykNET

 [divider]

Elders: Japan

Begin Dinsdag 2 Julie 21:00.

Elders: Japan is die tweede Elders-reeks ná verlede jaar se Camino-avontuur in Spanje. Hierdie keer reis Erns Grundling en ’n klein kameraspan na Japan, waar hulle die Land van die Opkomende Son gaan verken.

Met die komende Rugbywêreldbeker, asook aanstaande jaar se Olimpiese spele wat in Japan aangebied gaan word, bied Elders: Japan vir kykers ’n blik op hierdie fassinerende land.

Erns hou van stap, en om te bly by die staptema van die eerste reeks verken hy twee pelgrimstogte in Japan, naamlik die Kumano Kodo en die Nakasendo.

Verder ervaar Erns Japan se wonderlike kultuur, kos, oorweldigende stede, pragtige natuurskoon en hou hy sy lyf onder meer samurai, ninja en sumostoeier.

Soos in die eerste seisoen bied Elders: Japan baie spontane oomblikke en verrassings. Elders: Japan is ’n opwindende lusmaker vir die Rugbywêreldbeker en sal kykers inspireer om ook hierdie ongelooflike land op hul bucket list in te sluit.

Genrè: Reis

Stêrre te sien: Erns Grundling

Kanaal: kykNET

[divider]

Bolhuis S02

Begin Woensdag 31 Julie 20:00

In hierdie seisoen is Mike op soek na internasionale voorvlugtiges, fokus hy op moorde tot bedrog en kyk hy na die nuwe dwelms wat veral skoolkinders teiken. Okkultiese bedrywighede word onder die soeklig geplaas en Mike probeer ‘n dorp red en waarsku op sy unieke manier wie jy op verlief moet raak en wie nie.

Ons sien die sagter kant van Mike wanneer hy Kimberley besoek om die flaminke vry te laat wat hy onlangs gered het en daar is selfs ‘n troue op die horison. Soos met die vorige seisoen, kan kykers ‘n Mike verwag wat nie skroom om doekies om te draai nie!

Genrè: Misdaad

Stêrre te sien: Mike Bolhuis

Kanaal: kykNET

[divider]

Met ’n huppel in die Stap

Begin Woensdag 3 Julie 17:30

Met ‘n huppel in die stap begelei sestig-plussers met kundige advies oor die lewe ná aftrede. Onderwerpe soos oudhedeversameling, lekker kursusse vir seniors, seniors en hul kinders op dieselfde woonperseel, beplan jou aftreehuis en nog baie meer word bespreek.

Genrè: Leefstyl

Stêrre te sien: Riaan Cruywagen, Simon Bruinders en LIeb Bester.

Kanaal: kykNET

[divider]

Jan Braai vir Erfenis S09

Begin Saterdag 6 Julie 18:00

In hierdie nuwe seisoen van Jan Braai vir Erfenis, deurkruis Jan en die span die wêreld opsoek na nuwe avonture, pragtige plekke en lekker braairesepte.

Hoogtepunte sluit in die geelstert-seisoen aan die Suidkus, subtropiese vrugte seisoen in die Laeveld en somer in Madagaskar.

Genrè: Leefstyl

Stêrre te sien: Jan Scannell

Kanaal: kykNET

[divider]

Slank

Begin Sondag 7 Julie 17:30

Vier bekende Suid-Afrikaanse families word oor ‘n tydperk begelei deur geneeshere en dieetkundiges om ‘n gesonde leefstyl van lae koolhidrate en gesonde vette aan te moedig.

Die families se eetgewoontes kom onder die soeklig by geleenthede soos verjaarsdagpartytjies, uitstappies, kuiertjies deur vriende en selfs kospakkies skooltoe. Die outeur van drie kookboeke, Iné Reynierse, gee raad aan die families oor hoe om ‘n gesonde leef- en eetstyl vol te hou.

Genrè: Leefstyl

Stêrre te sien: Leandie du Rand en Iné Reynierse.

Kanaal: kykNET

[divider]

Kunsvlyt S03

Begin Maandag 8 Julie 17:30

Dis tyd om te eksperimenteer, uit die boks te klim en wild oor die lyne in te kleur. Hierdie keer is daar tien nuwe kunsvlyters wat hul kreatiwiteit moet inspan om met elke probeerslag met ’n nuwe unieke skepping vorendag te kom.

Daar’s ook heelwat nuwe kinkels in die uitdagings wat gaan sorg vir groot pret, so tussendeur die kompetisie.

Genrè: Realiteit

Stêrre te sien: Michelle Holtzhausen

Kanaal: kykNET

[divider]

A Glorious Human Achievement: Nelson Mandela

Begin Sondag 28 Julie 20:00

’n Mini-reeks bestaande uit ses episodes waarin Zelda la Grange vertel van dele van oudpresident Mandela se lewe waarvan min mense weet. Zelda was 19 jaar lank Madiba se persoonlike assistent en sy was tot sy dood vyf jaar gelede aan sy sy.

In dié reeks is verskeie ander mense te sien wat op ’n manier ’n verbintenis met Nelson Mandela gehad het, insluitend Mandla Mandela, Bill Clinton, Bono, Richard Branson, Morgan Freeman, aartsbiskop Bishop Desmond Tutu, George Bizos en Eddie Daniels, wat 17 jaar saam met hom op Robbeneiland deurgebring het.

Genrè: Dokumentêr

Stêrre te sien: Zelda la Grange, Mandla Mandela, Bill Clinton, Bono, Richard Branson, Morgan Freeman, Desmond Tutu, George Bizos en Eddie Daniels.

Kanaal: kykNET

[divider]

Helmut Lotti: Soul Classics in Symphony

Sondag 7 Julie 10:30

Die Soul Classics in Symphony-konsert sluit ’n verskeidenheid klassieke treffers in, soos My Girl, Wonderful World, Bring It on Home, If You Don’t Know Me By Now, So You Win Again and No More Wasted Years, wat die intensiteit van die wêreldbekende Belgiese tenoor Helmut Lotti se romantiese stem ten toon stel.

Helmut Lotti het al meer as 13 miljoen albums verkoop wat platinum en goue status wêreldwyd bereik het. Hy het ook ál sy treffers in meer as 13 tale op 23 albums op geneem.

Genrè: Musiek

Stêrre te sien: Helmut Lotti

Kanaal: kykNET en kykNET NOU!

[divider]

Starlight Classics Jhb: In Concert with RMB

Musiek

Sondag 14 Julie 10:30

‘n Ligte klassieke konsert onder die sterre, met optredes deur kunstenaars soos Mafikizolo, Ard Matthews, Zoë Modiga, Rocco de Villiers, Aubrey Lodewyk en Elza van den Heever.

Genrè: Musiek

Stêrre te sien: Verseie

Kanaal: kykNET en kykNET NOU!

[divider]

Dominee Tienie

13 en 14 Julie

Ná sestien jaar as predikant van die Moedergemeente word Tienie Benade gekonfronteer met ’n geweldige daling in lidmaatgetalle en ’n moderne gemeenskap wat by die dag verander. Is daar nog ’n plek in hierdie wêreld vir predikante óf die kerk? Hy probeer sy bes om aan te pas en sin te maak van die veranderings, maar in die proses vervreem hy sy vrou en kinders.

Ná ’n insident met ’n sterwende boemelaar bevind Tienie homself by ’n kruispad. Sal hy sy selfvertroue en die liefde van sy gesin kan terugwen en sal hy dapper genoeg wees om sy gemeente in ’n nuwe era in te lei? Gegrond op die toneelstuk deur Dana Snyman.

Genrè: Fliek

Stêrre te sien: Onder andere, Frank Opperman, Regardt van den Berg.

Kanaal: kykNET en kykNET&kie

[divider]

Die Van Coke Show

Begin Vrydag 12 Julie 21:00

Die Van Coke Show is ’n speletjies- en geselsprogram waar almal kliphard speel om niks te wen nie. Saam met bekendes en komediante gaan Francois die draak steek met al die malligheid wat in die wêreld aangaan.

Elke week sal spanne teen mekaar meeding in vinnige vraag-en-antwoordsessies en ook lekker skerts oor musiekvideo’s op daardie vreemde ding wat ons die internet noem. Van Coke word elke week bygestaan deur spankapteine soos Cindy Swanepoel, Jonathan, Beer Adriaanse en Quanita Adams.

Genrè: Speletjie en Gesels

Stêrre te sien: Francois van Coke, Cindy Swanepoel, Jonathan, Beer Adriaanse en Quanita Adams.

Kanaal: kykNET&Kie

[divider]

Mooimaak met Clare Wiese-Wentzel

Begin Dinsdag 23 Julie 20:30

Mooimaak met Clare Wiese-Wentzel keer terug vir ’n tweede seisoen van uitsonderlike transformasies. In hierdie seisoen reis Clare en haar span van kenners regoor die land om deelnemers se lewens te verander.

Met wenke uit haar eie lewe, help Clare die deelnemers en kykers by die huis om die mooi in hulle eie lewens weer te ontdek.

Genrè: Leefstyl

Stêrre te sien: Clare Wiese-Wentzel

Kanaal: kykNET&Kie

[divider]

Bolhuis S1

Begin Woensdag 31 Julie 21:00

Spesialis-ondersoeker Mike Bolhuis – die man wat wetsoortreders se broeke laat bewe – is in die misdaadsreeks Bolhuis te sien.

Mike, wat beskou word as een van Suid-Afrika se top-ondersoekers, was al betrokke by van die land se grootste moord- en bedrogsake. In dié reeks delf ons dieper in van die sake wat al op sy lessenaar beland het, soos die Delmas-moorde, waarin die vyf maande oue Wiehan Botes en sy oppasser vermoor is en waarvan die moordenaar steeds op vrye voet is.

Genrè: Misdaad

Stêrre te sien: Mike Bolhuis

Kanaal: kykNET&Kie

The post kykNET: Nuwe Reekse, Seisoene en Flieks appeared first on Stage and Screen.

kykNET is opgewonde om aan te kondig dat die gewilde sepie, Getroud met Rugby, in Julie ‘n splinternuwe tydsgleuf kry. Aanhangers van dié sepie kan vanaf Maandag 1 Julie om 18:00 inskakel om uit te vind wat in die lewens van Die Stryders en hul familie en vriende gebeur.

Dit is nie al goeie nuus nie. Twee van kykNET se aktuele programme kry ook vanaf Julie ‘n nuwe uitsaaityd. Prontuit saai vanaf 8 Julie om 21:00 uit en KN Verslag in Gesprek skuif vanaf 3 Julie na 21:00.

Beide dié programme is reeds sedert 2015 gewild by kykers. Prontuit, wat vroeër vanjaar ‘n ATKV-Mediaveertjie in die kategorie, Beste nuus- of aktualiteitsprogram gewen het, ondersoek stories deur gesprek, ná dit nuus was. Aanbieder Kabous Meiring, wat vroeër vanjaar met ‘n ATKV-Mediaveertjie in die kategorie, Beste aanbieder of onderhoudvoerder van ’n nuus- of aktualiteitsprogram, bekroon is, verwelkom elke week kenners, leiers en opiniemakers op die program om gewigtige kwessies te bespreek.

KN Verslag in Gesprek bied weekliks ’n oorsig van nuusgebeure en aktuele politieke kwessies. Aanbieder Waldimar Pelser, wat in 2018 met ‘n ATKV-Mediaveertjie in die kategorie, Beste aanbieder of onderhoudvoerder van ’n nuus- of aktualiteitsprogram, weggestap het, skroom nie om kontroversiële kwessies met sy gaste te bespreek nie.

Kykers kan ook uitsien na ‘n paar splinternuwe reekse, sowel as nuwe seisoene van gewilde reekse op kykNET in Julie.

Die nuwe reekse wat begin in Julie, is ook vol-op. Kliek oop die kykNET logo hieronder, om meer te lees oor alles wat Julie, soos 2019 se tweede helfte aanbreek, op Suid Afrika se voorste Afrikaanse televisie kanale te sien sal wees.

Soos een van ons voorste komediante in sy unieke aksent sou sê: “Julie moet dit nie mis nie…”

The post kykNET het Nuwe Tydsgleuwe in Julie appeared first on Stage and Screen.

deur Louw Mulder

As ‘n mens terug dink aan die eerste dae van Binnelanders, onthou ‘n mens vir Gys de Villiers in die rol van Dokter Zieg Combrink, sy vrou, wat gespeel is deur Elzette Marschalk, en ook die ervare Jürgen Helberg, wat die rol van Kitte vertolk het. Dan sien jy hierdie gesoute akteurs in die koffiewinkel sit, met ‘n skelm Hans Strydom, oftewel Dokter At Koster, wat verby loop sonder om aandag aan enige iemand te gee.

Maar in so ‘n toneel, was daar net een karakter  wat ‘n glimlag op enige scenario kon sit, en dit was Toeks Muller, Kitte se vrou en Zieg se suster. Hierdie skinder-tannie van die kliniek, en Tonik se eienaar, was met welslae gespeel deur die asemrowende aktrise, Franci Swanepoel.  Ek het ‘n bietjie met Franci oor haar dae op Binnelanders gaan gesels.

Na Franci haar graad aan die Universiteit van Stellenbosch verwerf het, het haar loopbaan vlug gevat, en vandaar af tot nou, was daar nog geen einde in sig nie.  Van Televisie aanbieder op meeste van Suid-Afrika se kanale, rolle in ‘n hele spul rolprente, asook verskynings in TV-reeks soos onder andere Koöperasie Stories, Arsenaal, Hartland en Sterlopers, het haar talente in die Sepie-genre, wat insluit 7de Laan, Getroud met Rugby, en dan ook Binnelanders, vir geen ander terug gestaan nie.

Vir die eerste ses jaar van Binnelanders, van reeks na sepie, was dit vir Franci ‘n wonderlike ervaring om deel van Binnelanders te wees. “Die werksomstandigdhede was heerlik en uiters professioneel,” het sy vertel en sy voeg by: “Binnelanders was ‘n huis, en ‘n wonderlike platform vir my loopbaan.”

Gedurende hierdie tyd, was daar heelwat hoogtepunte vir Franci, veral die feit dat sy deel was van ‘n M-Net dramareeks, wat later tot trotse kykNET sepie ontwikkel het. “Hoogtepunte was die wonderlike voorreg om saam met ‘n groep jong en gesoute akteurs die pad te stap,” verduidelik Franci soos net sy kan.

Dit was vir Franci Swanepoel ‘n hartverskeurende besluit om van die Tonik-tonele afskeid te neem. “Toeks was so deel van my, maar daar kom dikwels ‘n onverwagte vurk in die pad, en ek moes ‘n ander koers in slaan”, het sy verduidelik: “Daardie laaste dag, toe ek my familie moes groet, was verseker my laagste punt op die Binnelanders-stel.”

Binnelanders is ‘n Afrikaanse sepie, en soos Franci erken, is die doel om te vermaak, op te voed, en ook Afrikaans se naam hoog te hou. “Dissipline en mededeelsaamheid is wat ek by Binnelanders geleer het, asook respek vir myself en vir die res van die cast en crew” vertel sy.

Onlangs, het ons onder andere vir Franci op kykNET gesien toe sy die reeks Oppi Kassie aangebied het. Volgende vir haar, is ‘n rol in ‘n tweede seisoen van ‘n kykNET sitkom, waaroor sy nie nou al verder wou uitbrei nie.

 Aan Binnelanders vir julle 3000ste Episode:

“Iewers het ek my hart op jul verloor. Elsje en jou span, welgedaan met ‘n fenominale reeks waarvan ek nogsteeds die grootste aanhanger is.” – Franci Swanepoel.

Die Taalversorging van hierdie onderhoud is behartig deur Christa Steyn

The post Ons Praat met Franci Swanepoel appeared first on Stage and Screen.

deur Louw Mulder

Afrikaanse sepies in vandag se Suid-Afrika sorg vir vermaak. Dít is die woorde van Reynardt Hugo, of in Binneland-kringe beter bekend as Dokter Tertius Jonker. “Mense kan met ‘n karakter vereenselwig omdat hulle dalk iemand soos dit ken,” het Reynardt tydens my onderhoud verduidelik. “Dit is ook ‘n medium wat baie uitdagend is, en as dit reg gedoen word, verskriklik baie genot kan verskaf,” voeg hy by.

Reynardt speel die hoof van ongevalle by Binneland Hospitaal, en hy beskryf sy karakter as somtyds konserwatief, maar tog met ‘n effense stoute kant aan hom. “Maar die stoute kant sien ons net nou en dan,” het hy by gelas.

Tertius is die wettige aangenome pa van Daleen se dogtertjie, Nina, en buite baie nood-tonele in Binneland, moes hy self deur die egskeiding met Daleen gaan.  “Tertius se opsie om ‘n meisie te kry, is nou oop,” het hy komies vertel. Ek het ‘n kans gevat om te probeer uitvind wat met Dokter Jonker gebeur in die volgende 3000 episodes, maar al wat ek uit hom uit kon kry, was: “…dalk ‘n paar liefdesdriehoeke…”

In 2008, het Reynardt sy Binneland-loopbaan afgeskop, en vier hierdie jaar ‘n dekade op die stel van kykNet se langste lopende sepie. “Ek het die geleentheid gekry om ander drome te bewaarheid, soos om ‘n band saam met Hugo Ludik te begin,” vertel Reynardt oor wat Binnelanders deur die jare vir sy loopbaan beteken het: “Binnelanders het ook gesorg dat ek by mense kon uitkom en hulle stories te kon hoor. Dit het verseker deure oopgemaak en daarvoor is ek verskriklik dankbaar.”

Al ken ons hierdie dokter meer as ‘n lid van ons land se mees suksesvolle boyband, Adam, het Suid Afrikaners al geleer om onderskeid te tref tussen die popstêr, Reynardt Hugo, en die dokter van Ongevalle, Tertius Jonker.  Vir Reynardt, aan die ander kant, is Binnelanders ‘n realiteit: “Dit is net ‘n storie, en my verantwoordelikeid strek vanaf die leer van die dialoog tot om op stel te wees,” sê hy.

“Om net by die sepie te kan werk is self ‘n hoogtepunt,” vertel Reynhardt vol selfvertroue. “Alles wat saam met dit gaan, elke toneel, elke bietjie lag op stel en die geleentheid om saam met ongelooflike akteurs te kan werk, maak deel daarvan uit. Dít is en sal altyd my hoogtepunt en herinnering wees,” voeg hy by.

Maar toe ek oor sy laagtepunte vra, het meneer Hugo met eerlikheid geantwoord: “Ek dink as ‘n mens nie jou beste gee nie, nie op jou game is die dag nie, ervaar jy ‘n laagtepunt. Dit gebeur maar met almal.”   Verder, gee Reynardt Hugo ‘n bietjie raad, ondanks hierdie laagtepunte: “Om elke dag so te fokus en te konsentreer, is van uiterse belang.”

Na ‘n dag in die Ongevalle, gaan Reynardt Hugo huis toe, en gaan aan met sy lewe. Binnelanders, soos wat hy erken, is baie toegeeflik as dit kom by sy rol in Adam: “Dit is as gevolg van Binnelanders wat ek ‘n tweede loopbaan in musiek het,” sê hy, as hy verduidelik dat sy gewildheid as alledaagse sepie-stêr, die hupstoot was wat die groep nodig gehad het.  Adam, die groep waaronder Reynardt saam met Ludik en Kyle Grant die Afrikaanse klanke herdefinieer, is onlangs vrygestel, en is saam met sy rol in Binnelanders ‘n getuienis van die liefde wat Reynardt Hugo vir die vermaaklikheidslewe het.  Lees meer oor Adam se nuutste album, hier.

 Aan Binnelanders vir julle 3000ste Episode:

“Ek wil baie dankie sê dat iemand die potensiaal in my raakgesien het om deel van hierdie ongelooflike span te wees.  Dit is as gevolg van julle dat ek ‘n loopbaan het.  Julle het my geleer dat ek nie beter as enige iemand is nie.  Dankie Binnelanders dat julle my bygestaan het in moeilike tye.” –  Reynardt Hugo.

Die Taalversorging van hierdie onderhoud is behartig deur Christa Steyn

The post Ons Praat met Reynardt Hugo appeared first on Stage and Screen.

deur Louw Mulder

As ek terugdink, back in the day, was Frankie, wat deur die baie bekwame Milan Murray gespeel is, een van my gunsteling karakters in Binnelanders, en dit is juis die rede dat Milan een van die aktrises was wie ek gekies het om mee te gesels, toe Stage and Screen hierdie geleentheid aangebied is.

Milan beskryf haar karakter, wat ook bekend gestaan het as Dokter Zieg Combink se skoonsuster, as ‘n uitgesproke, boheemse karakter wat die status quo uitgedaag het.  “Ek was deel van die aanvanklike cast, toe die reeks begin het,” vertel sy: “Ek was deel van die eerste drie jaar van die sepie, en het later vir so twee maande weer ‘n verskyning gemaak.”

Vir Milan, soos sy vertel, is ‘n sepie altyd ‘n tyd van finansiële stabiliteit. Om ‘n gereelde salaris te verdien, is ‘n rare verskynsel in ‘n akteur se lewe hier in Suid Afrika: “Ek kon my eerste motor bekostig, en ook ‘n huis koop.”   Milan se tyd by Binnelanders het tot ‘n einde gekom, toe sy swanger geraak het met haar eerste kind.  Stark Produksies het wel aangebied om haar swangerskap in die storie in te skryf, maar Milan wou nie. “Dis so ‘n persoonlike ervaring en ek wou dit nie met Frankie deel nie,” het sy verduidelik.

“Al my tonele saam met Franci Swanepoel was vir my ‘n hoogtepunt,” het sy gesê: “Ons tonele was heerlik geskryf met baie pittighede en komiese konflik. Ons het mekaar se ritmes later so goed geken. Beide ons karakters was dwars en uitgesproke, heerlike teenpole teenoor mekaar. Frankie was meer roekeloos en Toeks was weer meer beskermend en verantwoordelik,” het sy haar tonele saam met die bekwame Swanepoel, wat Toeks gespeel het, verduidelik.

Maar soos daar hoogtepunte was, het Milan ook laagtepunte gedurende haar tyd by Binnelanders ervaar. “Sepies bied vir jong akteurs die geleentheid om te leer en te groei en ook om ‘n voet in die deur te kry in ons industrie. Sommige groentjies dink egter baie innig hulle is die kat se snor en hanteer die senior personeel asof hulle dieselfde hoeveelheid ervaring het. Die erkenning van die publiek is te vinnig te veel, en dan bars die ego’s uit hulle nate,” het sy eerlik verduidelik, en ek kon amper hoor hoe dit Frankie kon wees wat met my praat. “Die moeilikste is om op jou lip te byt as jy teenoor daardie ego moet speel,” het sy verder gesê. “’n Ander, meer komiese laagtepunt, was toe ek twee maande swanger was, en met oggend-naarheid tussen tonele kon weghap.”

Vir Milan, het Binnelanders haar sonder twyfel dissipline geleer. Sy verduidelik die sepie as ‘n goed ge-oliede masjien, met elke deel wat sy eie meganisme is en eie funksie het. “Wees betyds en ken jou woorde,” het sy uitgelig.

Milan sit egter nie stil nie, en is onlangs in heelwat produksies op verhoog en skerm gesien. Volgende vir haar lê Die Byl 2, en natuurlik haar solo verhoogstuk, Weerkaats, voor.  Weerkaats, waarin Milan tans speel, is ‘n verhoogstuk wat geskryf is deur Retief Scholtz, en die regie word behartig deur Philip Rademeyer.  Weerkaats het vleuende resensies verdien by onderskeie 2017 kunstefeeste.   

Hou Milan se Facebook blad dop vir optredes naby jou.

 Aan Binnelanders vir julle 3000ste Episode:

“Aan Elsje en wyle Frederich Stark, welgedaan. Julle het die vermoë om ‘n enorme produksie seepglad te laat vloei, terwyl julle altyd in die oog hou dat almal van ons ook net mense is. Baie geluk aan elke HOD, skrywer, regisseur, tegnici en akteur. Wat ‘n Span.” – Milan Murray. 

Die Taalversorging van hierdie onderhoud is behartig deur Christa Steyn

The post Ons Praat met Milan Murray appeared first on Stage and Screen.

deur Louw Mulder

Almal het lief geraak vir verpleegster Daleen Jonker, Pippa se beste vriendin, Nina se ma, en natuurlik Dokter Tertius Jonker se vrou.  Netso, was alle Binneland-liefhebbers baie ongelukkig toe Daleen uit Pretoria uit trek.  Ter vieringe van Binnelanders se 3000ste episode, het ek kans gehad om met Daleen se rolvertolker te gaan gesels.

Desirè Gardner het die rol van Daleen Jonker, vroeër Oosthuizen, gespeel. “Daleen se karakter was ‘n sterk, dog neurotiese vrou wat as gevolg van liefde baie foute gemaak het,” het Desirè aan my vertel.  Daleen was ‘n karakter wat Desirè van 2008 tot 2015 haar eie gemaak het.

“My man is verplaas na Kaapstad toe en ‘n langafstand verhouding is ongelukkig net te moeilik vir my,” het sy vertel. Sy het ook gesels oor hoekom haar tyd by Binnelanders tot ‘n einde moes kom: “Die lewe het ons in ons volgende hoofstuk geplaas, en so het die dinge gebeur.” Met die verhuising saam met haar gesin na die Moederstad toe, het Desirè ‘n rol gekry in ‘n ander kykNET sepie, Suidooster, waar sy tans die karakter van Carmen vertolk.

“Suidooster is baie dieselfde as Binnelanders in die sin dat mense deel van ‘n familie voel,” vergelyk Desirè die twee sepies met mekaar. Daleen, haar karakter in Binnelanders, en Carmen, haar rol in Suidooster, verskil wel baie, maar Desirè erken dat sy baie by Suidooster leer, en dat sy dit ook geweldig geniet om van ander kulture te leer. “Ek is dankbaar en geseënd om by projekte soos Binnelanders en nou by Suidooster betrokke te wees”, het sy aan my vertel.

Binnelanders het ongelooflik baie vir Desirè beteken: “Dit was ‘n ongelooflike leerskool, ‘n platform waarvoor ek altyd dankbaar sal wees, met ‘n klomp mense wat ek altyd sal mis,” sê Desirè. Vir haar is daar baie hoogtepunte wat sy na aan die hart dra: “My finale toneel sal altyd spesiaal bly, want ek het daardie dag vir my ander familie totsiens gesê. Ek het my tonele met Reynardt Hugo, Je-ani Swiegelaar en Nadia Valvekens veral baie geniet. Daai tye wat mens soms wil lag maar nie mag nie, sal my ook altyd by bly.”

Vir Desirè, is die doel van ‘n sepie in vandag se televisiebedryf, een van ontvlugting: “Mense het nodig om die alledaagse drama en hartseer, en soms verveling van hulle eie lewens, te ontvlug met iemand anders se storie,” verduidelik sy: “Mense hou ook daarvan om met iemand anders te vereenselwig en te identifiseer.”

As dit kom by dit wat Desirè Gardner tydens Binnelanders geleer het, is daar baie wat sy kan vertel: “Ek het basies alles wat ek vandag weet van ‘n multicam daar geleer. Ek het geleer om altyd professioneel te wees. ‘The show must go on’, tensy jy met ‘n drip in die hospitaal lê,” lag sy en vertel verder: “selfs dan, kan jy ‘n plan maak.” Die veelsydigheid om as aktrise met verskillende regisseurs te werk, hulle te leer ken, en die dinge toe te pas al sou dit met haar verskil, is iets wat Desirè uitlig: “Ek het by Binnelanders net so baie by my mede-akteurs geleer.”

 Aan Binnelanders vir julle 3000ste Episode:

“Welgedaan aan elke liewe een. Veral diegene wat van Episode 1 af daar was. Dis ‘n ongelooflike produk waaraan julle werk en ek kan nie wag vir die volgende 3000 episodes nie. Welgedaan aan die skryfspan wat aanhou om exciting stories te vertel, die akteurs wat die karakters interessant hou en die crew wat elke dag mooi prentjies maak.”  – Desirè Gardner.

Die Taalversorging van hierdie onderhoud is behartig deur Christa Steyn

The post Ons Praat met Desirè Gardner appeared first on Stage and Screen.

deur Louw Mulder

In ‘n Netwerk24-artikel wat op 16 Junie 2016 deur Fanie Cronje geskryf is, is daar na Stefanie Malherbe as die ‘Feeks van reeks’ verwys. Ek onthou hierdie karakter nog van die tyd toe Binnelanders ‘n dramareeks op M-Net was.  Stefanie, die ontvangsdame van Dokter Zieg Combrink se praktyk, was die minnares van haar baas, en so het juffrou Malherbe baie onpopulêr onder die Binnelanders geword. Stefanie was vir amper sewe jaar deur Rolanda Marais gespeel, van die begin af in 2005 tot laat in 2011.

Tydens my onderhoud met Rolanda het ek agtergekom dat haar fokus en talente op haar menswees as ma en as kunstenaar geplaas word en dat hierdie veelsydige aktrise maar min woorde vir joernaliste het.

Vir Rolanda, bied ‘n sepie in vandag se tye aan akteurs ‘n stabiele inkomste wat volgens haar maar skaars is in die industrie, wat meestal baie onseker en sporadies kan wees. Maar haar rol in hierdie sepie, Binnelanders, het vir haar ‘n baie dieper betekenis as die vaste salaris. “Ek het ‘n household naam geraak. Om by Binnelanders destyds aan te sluit, was ‘n loopbaan besluit wat ek gemaak het. Ek het in die Kaap gebly en besef dat dit ‘n goeie stap sal wees om beter bekend te word onder die Afrikaanssprekende gehore,” het sy met my gedeel.

“My tyd by Binnelanders het my geleer om op te square, en ‘n kamerabewustheid te hê,” het Rolanda vertel. “Ek kan nie onthou wat my gunsteling toneel was nie, maar ek het dit regtig geniet om met die mense daar te werk, voor en agter die kameras,” vertel sy gretig, maar met min woorde. “Ek het van my beste, lewenslange vriende daar ontmoet. As mens so intiem saam met ander mense werk, leer ken jy die mooiste en slegste van ‘n persoon. Jy raak soos family. Dis baie spesiaal.”

Alhoewel sy nie baie gesê het nie, was dit tog moontlik vir my om baie duidelik tussen die lyne te lees hoeveel passie Rolanda Marais het vir wat sy doen. Toe ek haar vra hoekom sy by Binnelanders weg is, het hierdie liefde wat sy vir toneelspel het, weer duidelik geraak: “Ek geniet dit om verskeie karakters te vertolk. Dit is uitdagend en stimulerend om met elke projek in ‘n nuwe karakter se kop te klim. By Binnelanders, om dieselfde rol jaar in en uit te speel was nie ideaal nie.”

Na haar ervaring by Binnelanders, het ons vir Rolanda in vele ander televisiereekse gesien, onder andere Vlug na Egipte, High Flyers, en ook die kykNET-reeks, Waterfront, waar sy die ma van Edwin van der Walt se karakter vertolk het. Op die silwerdoek, het sy haar talente uitgeleef in speelfilms soos Wolwedans in die Skemer, Ballade vir ‘n Enkeling, Freestate en Bloodline. Vele ander bydrae tot teater en die televisie word nog op Rolanda se resumé gesien. Maar vir nou, kan ons uitsien na Rolanda Marais se rol in ‘n opkomende film, met die titel, Die Seemeeu. 

 Aan Binnelanders vir julle 3000ste Episode:

“Keep on Keepin’ On.  Julle Maak Mooi.” – Rolanda Marais.

Die Taalversorging van hierdie onderhoud is behartig deur Christa Steyn

The post Ons Praat met Rolanda Marais appeared first on Stage and Screen.