Michael Blignaut se tweede enkelsnit, Hemelwater, is onlangs vrygestel en nou volg die musiekvideo vir hierdie inspirerende lied. Die lied is geskryf deur die uiters talentvolle Vaughan en Nerine Gardiner.

Die musiekvideo is in Johannesburg geskiet en begin in ‘n atteljee met fotorame sonder fotos om die leegheid wat hy ervaar, te beskryf. In die tweede helfde van die musiekvideo verskyn die aktrise Mila Guy, wat die persoon na wie hy so lank al soek, verteenwoordig. Hierdie gedeelte is in ‘n park verfilm en Jacques “Jay” Loots van Fathom Media het die video geskiet en behartig.

Die kyker kan nou visueel die video gebruik as voorbeeld wat hy of sy al ervaar het in ‘n soortgelyke situasie. Dit skep moed en gee hoop vir ‘n wonderlike einde.

Hemelwater is nou beskikbaar op alle digitale platforms.

The post Michael Blignaut: Hemelwater appeared first on Stage and Screen.

Die Jazz-prinses van Mosselbaai met die tydlose stem, Sunel, wat bekendheid verwerf het vir haar debuut-enkelsnit, Fickle Heart en wie se tweede enkelsnit, Hart Op Jou Mou, bo-aan verskeie trefferparades gepryk het, het onlangs haar derde enkelsnit en musiekvideo, Hart se Wens vrygetel.

Sunel het Hart se Wens  self geskryf en dit is gebasseer op ‘n liefdesteleurstelling.  Dit is die tipe liedjie wat jy moet luister as jou hart werklik vir die eerste keer gebreek word.

Die liedjie was reeds klaar geskryf en opgeneem, maar toe kruis haar paaie met die van Hugo Ludik en Vaughan Gadiner van Muse Produksies.  Hulle was opgewonde om haar te help om die liedjie tot sy volle potensiaal te bring en iets heeltemal uniek te skep.

Die musiekvideo is in Johannesburg in ‘n groot stoor kamer geskiet en vervaardig deur Fathom Media.  Die konsep agter die video was om iets te skep wat eenvoudig, tog treffend is.  Om iets te skep wat die fokus werklik om die liedjie plaas en om al die emosie wat saam met die liedjie kom uit te bring.  Iets kwesbaar, maar tog sterk.  Sunel sê dit was wonderlik om saam met Jacques Loots en sy span by Fathom Media te werk: “Hulle het dit vir my so spesiaal gemaak as wat hulle kon.  Jay het dieselfde visie vir die video en liedjie gehad as ek en ons het dieselfde kreatiewe energie gehad”.

Hart se Wens is binnekort beskikbaar op alle digitale musiekwinkels.

Sunel se debuut-album sal aan die einde van Mei 2019 vrygestel word.

The post Sunel: Hart se Wens appeared first on Stage and Screen.

Samantha Leonard se tweede enkelsnit, Jou Hart Sal Heel Raak, is onlangs vrygestel en nou volg die musiekvideo vir hierdie treffende ballade. Die lied is geskryf deur die uiters talentvolle Vaughan en Nerine Gardiner.

Die musiekvideo is by Amorosa, aan die voet van die majestieuse Magaliesbergreeks, tussen Pretoria-Noord en Hartebeespoortdam, geskiet. Ryno Mans van RM Productions het die video geskiet en Samantha het die konsep uitgedink en die regie behartig.

Samantha vertolk die diep lirieke van Jou Hart Sal Heel Raak in ‘n asemrowende trousaal, asook buite tussen die bergreeks by ‘n klavier, terwyl water oral op en om haar afstroom. Die mooi natuur  met die berge in die agtergrond was die perfekte plek om die boodskap oor te dra dat ons altyd die mooi in die lewe moet probeer onthou, al dra ons soveel seer saam ons elke dag.

Dit was nogal ‘n uitdaging op die dag aangesien die produksiespan net ‘n uur gehad om die klaviertonele buite te skiet, vir die perfekte beligting met die sonsondergang.

Samantha Leonard se debuut-album word op 1 Maart 2019 uitgereik.

The post Samantha Leonard: Jou Hart sal Heel Raak appeared first on Stage and Screen.

Suid-Afrika se bekroonde country-duo is terug met ’n splinternuwe enkelsnit, Maatstaf vir my Hart , wat nie net gaan voortbou op die unieke,moderne country-popstyl waarvoor hulle bekendheid verwerf het nie, maar ook die kieskeurigste musiekoor tevrede sal stel.

Heuning, wat bestaan uit Jeanette Pretorius en Hansie Roodt, se nuutste vrystelling kombineer ’n lekkerluisterwysie met hoendervleismooi lirieke, wat sommer dadelik diep in jou hart kruip wanneer jy dit hoor. Die liedjie is deur Vaughan Gardiner geskryf en gaan oor ’n persoon wat haar geliefde verloor het, maar die positiewe daaruit haal deur hulle tyd saam te koester en alle potensiële verhoudings te meet aan die liefde wat hulle gedeel het.

Dit is die groep se eerste opname met Hansie as nuwe lid en hulle hoop dat hul musiek vir luisteraars iets sal beteken, al is dit net om hulle te laat glimlag na ’n lang dag. Die enkelsnit is die eerste vrystelling vanaf hulle nuwe album, wat later vanjaar uitgereik word en daar word ook reeds aan ’n musiekvideo beplan.

Heuning se selfgetitelde debuutalbum is in 2012 uitgereik en was onmiddelik ’n treffer onder jonk en oud. Nie net het dit in 2013 ’n Ghoema-toekenning vir Beste Country-album asook ’n Huisgenoot Tempo-benoeming vir Beste Nuweling opgeraap nie,maar ook talle radiotreffers opgelewer, waaronder As ek Val, Bietjie Langer Bly, Drome en Ek Wil Met Jou Dans, asook talle suksesvolle musiekvideos wat vandag nog op die kassie te sien is. Die vrystelling van hulle album Drome, in 2015, het vir hulle die geleentheid gegee om by die Crystal Palace in Bakersfield, Kalifornië, te gaan optree.

Nadat een van die oorspronklike groeplede, Henk Dercksen, in 2016 besluit het om Spanje toe te gaan, was die musiekpaar steeds so in aanvraag dat Jeanette besluit het om die duo vir ’n lewendige orkes te verruil, wat baie goeie aftrek gekry het. Hansie, wat op daardie stadium vir die orkes baskitaar gespeel het, het egter so goed ingepas as gevolg van sy talent en veelsydigheid, dat daar besluit is om weer terug te keer na die groep se oorspronklike formaat.

Jeanette Pretorius het van kleins af ’n passie vir musiek. Sy het op twaalfjarige ouderdom reeds haar debuutalbum by Boet Pretorius van Decibel Musiek opgeneem, waarna vyf ander (waarvan twee kinderalbums en een ’n country-album is), gevolg het. Alhoewel sy van ’n wye verskeidenheid musiek hou, lys sy Martina Mcbride, Carrie Underwood en Patsy Cline as haar grootste musiekinvloede. Dié talentvolle gesinsvrou is nie net ’n goeie sanger nie, maar ook ’n kranige liedjieskrywer, jodelaar en aktrise, wat al verskeie gasverskynings op die kassie gemaak het. Verder het sy al op verskeie leefstylprogramme opgetree, waaronder Jukebox, DKNT, Noot vir Noot, Bravo, Kwêla en vele meer.

Hansie Roodt het in ’n musikale huis grootgeword. Sy pa was ’n meester kitaarspeler, saam met wie sy ma soms gesing het en sy broers is ook gesoute musikante. Sy loopbaan het egter eers in 2010 afgeskop, maar sedertdien was daar al baie hoogtepunte en kon hy al saam met baie bekendes musiek maak, waaronder Mel Botes. Hy geniet ’n breë spektrum musiekgenres, wat wissel van Jazz tot Heavy Metal, en het groot waardering vir John Petrucci en Mark Knopfler se werk. As hy nie ’n musikant was nie, sou hy graag ’n weermagvlieënier wou word.

Die sangpaar het nog baie planne en drome en sal graag in die toekoms wil hê dat hulle musiek soveel as moontlik plaaslike, sowel as internasionale gehore moet bereik. Maatstaf vir my Hart gaan nie net ’n gunsteling wees op al wat treffersparades is nie, maar gaan ook voortbou op die sukses wat Heuning reeds bereik het as ’n alternatiewe country-duo, met musiek wat direk met die hart praat.

The post Heuning: Maatstaf vir my Hart appeared first on Stage and Screen.

Michael Blignaut glo net soos Jimi Hendrix, dat musiek jou moeiteloos kan laat goed voel oor die lewe. Sy eerste enkelsnit, Naglig is die perfekte bewys hiervan. Dit is ’n kombinasie van mooi liefdeslirieke en ’n lekkerluister-wysie, wat beloof om die luisteraar te laat wegstap met ’n ekstra huppel in die stap en ’n opgewekte vrolikheid in die hart.

Dié dertig-plusser se eerste liefdesballade is geskryf deur Vaughan – en Nerine Gardiner en gaan oor daardie spesiale iemand wat weer liefde en geluk in jou lewe kan bring.

’n Musiekvideo van die snit word ook vir later vanjaar beplan, maar daaroor wil die ster nie veel meer verklap as dat die produksie deur Jay Loots van Fathom Media behartig gaan word nie.

Michael het in Piet Retief grootgeword en sing al van kleins af Danie Botha se liedjies saam met die radio. Alhoewel hy gereeld aan skoolkonserte deelgeneem het, het hy eers later in sy lewe besluit om sy musiektalent ’n kans te gee. Hy het aan verskeie kompetisies deelgeneem, waaronder Ons Soek Die Sanger, The Voice SA en Die Kontrak, maar sonder veel sukses, omdat dit nie die regte tyd was nie.

Na skool het hy Besigheidsbestuur en Toerisme studeer by die Tshwane Universiteit van Tegnologie waarna hy sy ouers gaan help het by hulle restaurant en gastehuis, wat later uitgebrei het. Hy was egter nooit van plan om sy musiekdroom heeltemal prys te gee nie en het besluit om deel te word van ’n musiekgroep met die naam MP5, wat oor naweke by funksies en troues musiek maak. Dié groep het ook al die geleentheid gehad om twee keer in Mosambiek op te tree en die gehore het dit baie geniet. Verder is hy ook baie betrokke by sy kerk se lofsangbediening en by sy ouers se besighede.

As hy enige ander loopbaan moes kies, sou hy ’n mediaskakelbeampte wou word, omdat hy die vermaakbedryf baie interessant vind, maar verklap dat hy ook graag sy eie mansklerereeks sou wou hê. Wanneer hy nie sing nie, geniet hy dit om te reis en beplan juis om Desember ’n bietjie weg te breek Maldives toe.  Hy luister ook graag na ’n wye verskeidenheid musiek, maar sonder Riana Nel, Dewald Wasserfall, Michael Bublé, Celine Dion, Calum Scott en Adam Levine uit as sy gunstelinge. As hy eendag die geleentheid kry, sou hy ook graag saam met kunstenaars soos ADAM, Caroline Grace en Monique Steyn wou werk.

Die musiekbedryf het vir Michael Blignaut geleer om positief te bly, hard te werk vir wat hy wil hê en getrou te bly aan wie hy is. Naglig is die perfekte kombinasie van treffende lirieke en ’n meesleurende melodie, wat sy stem soos ’n handskoen pas. As dié treffer enige aanduiding is van wat hy beplan, wag daar voorwaar ’n blink toekoms op hierdie talentvolle kunstenaar in die musiekwêreld.

The post Michael Blignaut: Naglig appeared first on Stage and Screen.

Mari Bosman het pas haar nuwe enkelsnit, As Vrou, ter viering van Vrouemaand-en dag vrygestel. En nes haar siening van vrouwees, gaan die liedjie liefde en omgee in sy verskillende vorme uitstraal…

Mari wou graag iets daar buite sit ter vieringe van onlangse Vrouedag wat in Suid Afrika gevier is, vir ons vroulike rolmodelle. Sy wil ook met hierdie snit uitbeeld waarna sy streef in haar eie vrouwees. As Vour, is die enkelsnit wat sy saam met die skrywer Vaughan Gardiner gepen het. Hugo Ludik en Gardiner het die verwerking daarop gedoen.

Die Musiekvideo, wat deur Deon van Wyk opgeneem en vervaardig is, word ook vrygestel en dra nes die liedjie self ’n sterk boodskap aan vroue oor.

Mari is reeds twaalf jaar in die musiekbedryf doenig, en sê om ’n verhoog met van Suid-Afrika se top kunstenaars te deel, een van haar hoogtepunte is sover.

Sy put gereeld inspirasie uit plaaslike kunstenaars en liedjieskrywers soos Valiant Swart, Jan Blohm, Karen Zoid en Elvis Blue. Sy vertel dat Elvis se energie op die verhoog en die manier hoe sy lierieke en melodieë mense raak is iets besonders. Omdat hulle genre baie dieselfde is, is dit waarna sy streef. Nog een van haar gunsteling liedjieskrywers is Christoph Kotze, beter bekend as Appel.

Haar gunsteling musiek aanhaling is die van ene Bruce Springsteen, en lui: “The best music is essentially there to provide you something to face the world with.”

The post Mari Bosman: As Vrou appeared first on Stage and Screen.

Die donkerkop sangeres, Mari Bosman, het pas ’n nuwe goedvoel liedjie oor hoop en vergifnis vrygestel. Dié liedjie wat in Mari se woorde as rooiwyn rock beskou kan word, is deurdie talentvolle sangeres self geskryf.

Hou Vas is ’n folk-pop liedjie wat hoop gee in ’n donker land. Sean Manley het die verwerking van die liedjie gedoen, terwyl die bekwame Vaughan Gardiner gesorg het vir die meng en meester daarvan. Ricus Nel het op sy beurt gesorg vir die kitare op die liedjie. Hoe dan anders, as om met die beste te werk vir so ‘n positiewe boodskap…

Mari sê sy hoop die nuwe liedjie sal mense laat goed voel, inspireer en aanmoedig om die lewe met al twee hande aan te pak.

Die musiekvideo, wat deur Deon van Wyk opgeneem is, speel hoofsaaklik in Vaughan Gardiner en Hugo Ludik se ateljee af en beeld die proses uit vanaf inspirasie kry vir ’n liedjie, tot die finale produk.

Mari is reeds twaalf jaar in die musiekbedryf doenig, en sê om ’n vehoog met van Suid-Afrika se top kunstenaars te deel, een van haar hoogtepunte is sover. Sy put gereeld inspirasie uit plaaslike kunstenaars en liedjieskrywers soos Valiant Swart, Jan Blohm, Karen Zoid en Elvis Blue.

Mari glo soos die bedryf konstant verander moet kunstenaars hulself verander om by tye aan te pas. “Die musiekbedryf verg ook baie geduld, harde werk, geloof en uithouvermoeë,” vertel sy.

Benewens die uitreiking van haar nuwe liedjie en musiekvideo is Mari ook druk besig om aan haar tweede album, wat in samewerking met BBS Records opgeneem word. Volgens Mari is die nuwe album vol lekker-luister-liedjies en musiek met ’n dieper betekenis. “Ek wil mense aanraak deur lirieke en hulle ’n rede gee om weer positief te voel oor die lewe en die liefde.”

The post Mari Bosman: Hou Vas appeared first on Stage and Screen.

Die opgewekte, voetstamplekker wysie en vrolike lirieke van die liedjie, Hals Oor Kop, word deesdae gereeld oor die radio gehoor en het luisteraars van dag een af bekoor – net soos wat die sangeres, Kerry Lee, die afgelope paar jaar reeds diep spore kom trap het in die harte van aanhangers regoor die land.

Hals Oor Kop is geskryf deur Hugo Ludik – saam met wie sy voorheen gewerk het aan Shut Up En Soen My en Kaalvoet Boerseun – en Vaughan Gardiner en is ’n ritmiese country-treffer wat haar stem soos ’n handskoen pas. “Dit is ’n lekker tong-in-die-kies liedjie oor liefde en hoe malverlief jy kan raak wanneer jy jonk is.

Dit is regtig ’n voelgoed-snit waarmee luisteraars lekker kan saamsing en identifiseer,” vertel Kerry Lee. Die amptelike musiekvideo is ook pas bekendgestel en sy is baie opgewonde om dit met die publiek te deel. “Dit is ’n gemaklike musiekvideo, waar ons in die sitkamer sit en musiekmaak. Dit was soveel pret om op te neem en tussen sessies het ons lekker gesels en gelag. Dit is vir my so ’n voorreg om te kan sing en dit waaraan ons gewerk het vir mense te wys.”

Hierdie lewenslustige brunet hou al vandat sy drie jaar oud is konsert en het op die ouderdom van elf self ingeskryf vir haar eerste Eistedfod. Sy het Patricia Lewis se liedjie, Jy is die rede, gesing en dit was die begin van groot dinge. Gedurende haar hoërskooljare, in Nelspruit, het sy gereeld aan kompetisies deelgeneem en is sy selfs genooi om in Mauritius en Engeland op te tree.

Temaliedjies vir Love & Mortar en Street Rods Africa op DStv, ’n debuut-album, Vou Jou Arms Om My, in 2010, ’n optrede op die hoofverhoog by Innibos in 2011 en ’n nommer een-posisie op die Maroela Media Top 20-treffersparade met haar enkelsnit, Shut Up en Soen My, het aan haar ’n amptelike plek in die Suid-Afrikaanse musiekbedryf besorg.

Kerry Lee het groot bewondering vir kunstenaars soos Dolly Parton, Barbara Ray en Shania Twain en dit is daarom geen verrassing dat haar nuwe album, wat binnekort op die rak gaan wees, ’n kombinasie van moderne country-musiek is nie. Dans in die Reën bestaan uit elf snitte, waarvan nege oorspronklike werke is deur Vaughan Gardiner, Hugo Ludik en Roux Cloete.

Die titelsnit, Dans in die Reën, is ’n treffende akoestiese opname, wat selfs die kritieste oor tevrede sal stel. “Die album gaan hoofsaaklik oor menslike gevoelens, veral die liefde. Die titelsnit, asook Werklik Myne Maak, lê my na aan die hart omdat dit gebaseer is op my persoonlike ervarings. Die CD is meer volwasse as my vorige werk, maar steeds jonk en prettig. Ek hoop dat dit luisteraars weer van vooraf verlief sal maak op die liefde,” verklap sy.

Om voltyds te sing bly haar grootste droom, maar intussen hou sy die pot aan die kook deur by hulle familiebesigheid te werk en net saans en oor naweke op te tree, maar sy meen dat dit oor-en-oor die moeite werd is. “Hulle sê daar is niks daarmee verkeerd om groot te droom nie en, in die nabye toekoms, wil ek graag twee oorspronklike country-liedjies in Engels opneem en Nashville toe stuur.

Kerry Lee se gunstelingaanhaling oor die lewe kom uit die liedjie, Country Strong, en gaan daaroor om nooit op te hou glo en baklei vir dit wat jy wil hê nie en sy is ’n spreekwoordelike voorbeeld van hoe harde werk jou drome kan waar maak. As sy nie ’n sanger was nie, sou sy graag ’n forensiese antropoloog wou word, maar gelukkig het sy dit liewer aan die span van Bones oorgelaat, want dit is in die harte en ore van musiekliefhebbers, waar sy die grootste verskil kan maak.

The post Kerry Lee: Dans in die Reën appeared first on Stage and Screen.

Deur Jaco Lotriet

Anna is ‘n gebroke, middelklas vrou in hierdie genadevolle moraliteit spel, onder die regie van bekroonde Suid-Afrikaanse film en televisie reggiseur, Regardt van den Bergh. Haar gemoedstoestand is gewikkel in ‘n stryd met haar gewete, as gevolg van haar diep Christelike waardes. Dié worsteling lei eindelik tot ‘n beduidende misstap wat haar duur te staan kom. In ‘n desperate oorlewing skuif, distansieer sy haarself van enige konflik, deur haar te skaar met ‘n klein plattelandse gemeenskap in die mooie Langkloof, Oos-Kaap. By die klein plaasskooltjie, Uitvlucht, speel die intrige hom af. Die nuwe dinamiek waarin sy haarself bevind, bemoeilik die situasie net verder… Ironies genoeg, is die titel van die film ook die een woord wat haar situasie versinnebeeld.

In ware Regardt van den Bergh styl, word Uitvlucht vertel vanuit die oogpunt van ‘n alledaagse lewe, gevul met wanhoop en uitdagende struikelblokke. Die onderliggende geestelike tema word gebalanseer deur drama en humor wat ontvou met die verloop van die liefdesverhaal. Moet glad nie ‘n soetsappige liefdesverhaal verwag nie maar liewer ‘n geïmpliseerde liefde tussen die twee hoofkarakters wat stelselmatig verdiep met die verloop van die film.

Uitvlucht word aan die gehoor oorgedra vanuit ‘n verteller oogpunt, deur pastorale figuur Joshua, vertolk deur gesoute veteraan akteur, Carel Trichardt.  Trichardt kan onthou word as die stem agter televisie kinderkarakter Knersis en speler in ander produksies soos Vyfster. Hierdie vorm van verhaal oordrag skep ‘n verwagting by die kyker van meet af met die vergunning van ‘n noukeurig deurdagte draaiboek. Laasgenoemde verleen ‘n egtheid aan die produksie en die universele temas laat die gehoor nadink oor die gebeure wat uitspeel op die skerm.

Die rol van Anna word vertolk deur Clara Joubert van den Bergh, wie voorheen te sien was as Hes in die tv reeks, Orkney Snork Nie, en meer onlangs in Kyknet se Terug na Egipte. Haar karakter in Uitvlucht ontlok ‘n wipplank van emosies by die kyker deur haar saggeaarde, moederlike figuur, wat in sterk kontras staan met haar donker kant. As kyker, voel jy die angs wat sy ervaar en kry jy haar innig jammer. Tog is dit moeilik om te verwerk dat ‘n liewe vrou soos Anna vir haarself so baie moeilikheid kon veroorsaak het. Clara se deurdagte spel is ontoegeeflik afgerond en spruit uit die feit dat sy as draaiboek skryfster van die film, die verhaal losweg gebasseer het op haar eie lewens ervaringe. Dit dra juis by tot die egtheid van die storie en vereenselwiging met die karakter, al het jy nog nooit in haar skoene geloop nie.

Die karakter van Dok word vertolk deur Stian Bam. Bam is bekend vir sy rol in Sean Else se Modder en Bloed, en word ook eersdaags te sien in sy nuwe film, My Father’s War. As Anna se silwerdoek liefde, dien sy karakter as teenwig teenoor hare. Bam se sensitiewe oorlewering is pryssenwaardig en sy toenadering tot Anna voel ongemaklik en selfs onbeholpe. Dit is sy sagte gees wat Anna orreed om haar hart eindelik vir hom oop te maak. Bam se vertolking van Dok laat mens wonder of dit die tipe man is waarna alle mans kan nastreef, met verwysing na sy persoonlikheid en wat ‘n vrou in ‘n man sal wil soek.

Alhoewel ek gewoonlik hoofkarakters of uitstaande spel uitsonder, is die byspelers eweweens belangrik in elke produksie, waarvan Uitvlucht natuurlik geen uitsondering is nie. Die rolverdeling is ‘n lang lys van welbekende akteurs, waaronder Clyde Berning van Known Gods, Artes wenner Margot Luyt en Jill Levenberg van televisie geledere. Veteraan verhoog akteur Neels Coetzee, as Oom Sammie en Oscar Petersen in die rol van Pieta, dra ook by tot ‘n unieke vertolking van die verskillende kulture in die storie. Bas, gespeel deur Marvin-Lee Beukes, is ‘n relatiewe nuweling op die grootskerm, en speel as Dok se betroubare linkerhand. Sy karakter se kombinasie van skerp humor, waarneming en simpatie is verfrissend deur die loop van sy rol.

Merkwaardig genoeg, is die 48 leerlinge van Uitvlucht skool, wat onder die rolverdeling tel en hoegenaamd nie hoef terug te staan vir enige professionele akteur nie. Hierdie klas vol kleurling kinders se eerlike vertolkings verleen verder ‘n egtheid aan die produksie. Dit is duidelik te siene in elke toneel waar hulle met vrymoedigheid en spontaneïteit hul spesiale merk van humor aan die kyker oordra.

Ek het voor die vertoning die voorreg gehad om skouers te vryf met Geo Höhn, maestro en komponis van Uitvlucht en vele ander produksies, onder andere Verskietende Ster, wat tans draai. Hy het my trots vertel hoe ‘n groot eer dit vir hom is om sy werk in moderne rolprente te hoor. “’n Mens sit nagte om, alleen in jou studio en werk hard om jou musiek sover te kry om die storie te vertel”, het hy gesê. Höhn se deskundige finesse doen die film gestand, deur die gehoor mee te sleur in Anna se wêreld. Ek sien met opwinding uit na sy volgende projek.

Vaughan Gardiner se temalied Bou Aan Liefde, verwesenlik die gevoel van die film met gemak. In ‘n vorige onderhoud, het Vaughn vertel dat hy en sy vrou dadelik geweet het wat die gevoel van die liedjie moet wees, direk nadat hulle die eerste rowwe weergawe van die rolprent gesien het. “Sy het weggespring met die lirieke en dit was sommer vir my maklik om die regte melodie vir die liedjie te skryf, want dit is ‘n film wat ‘n mens nie net kyk nie, maar wat jy ook voel…” het Vaughn in die onderhoud vertel.

‘n Film soos Uitvlucht bevat heelwat natuurskote wat as vertoonvenster van ons prentjie-mooi land dien. Kinomatograaf Zenn van Zyl het hom goed in hierdie taak gekwyt. ‘n Mens hoop dat nog meer produksies in die toekoms in die Oos-Kaap verfilm sal word.

Regardt van den Bergh en sy vrou Clara, tesame met vervaardigers Vlokkie Gordon en Lika Berning, het daarin geslaag om ‘n treffende, egte storie van hoop, genade en van liefde wat alles oorwin, op die grootskerm te verwesenlik.

Uitvlucht word met trots aangebied deur Movies for LIve en Advantage Entertainment, in samewerking met kykNET films en die Development Corporation en word op 13 Mei 2016 in Suid-Afrika in teaters uitgereik.

The post Review: Uitvlucht appeared first on Stage and Screen.

Vaughan Gardiner, bekende sanger, liedjieskrywer en vervaardiger, het hierdie pragtige lied spesiaal vir Uitvlucht geskryf.

“Dit is ‘n ongelooflike voorreg om hierdie liedjie in Uitvlucht te hê,” sê Vaughan. “Alishia van Deventer van Starburst Promosies het my gekontak en gevra of ek belang sal stel om die temalied te skryf en ook om die liedjie te sing.”

Uitvlucht is regisseur en vervaardiger Regardt van den Bergh se jongste film en is ‘n drama wat die verhaal vertel van Anna (Clara Joubert van den Bergh) wat alles in haar lewe verloor weens ‘n misstap, maar wat dan werk kry op die plaasskooltjie, Uitvlucht.

Met die ondersteuning van ander onderwysers en Dok (Stian Bam), ‘n vriendelike boer wat die skool besoek en haar bevriend, leer sy om haarself te vergewe en begin aanvaar dat iemand dalk weer lief vir haar kan wees. So raak sy betrokke by die skoolkinders se lewens en hul hartseer en probeer vir hul ook redding bied.

“Ek en my vrou Nerine het die rowwe weergawe van die film gekyk en dadelik geweet wat die gevoel van die liedjie moet wees. Sy het weggespring met die lirieke en dit was sommer vir my maklik om die regte melodie vir die liedjie te skryf, want dit is ‘n film wat ‘n mens nie net kyk nie, maar wat jy ook voel,” sê Vaughan.

Uitvlucht is ‘n storie van hoop, genade en van die liefde wat alles oorwin.

Oscar Petersen, Lika Berning, Clyde Berning, Margot Luyt en Carel Trichart is ook te sien in die rolverdeling.

Uitvlucht word op 13 Mei 2016 in Suid-Afrika deur Ster-Kinekor Entertainment uitgereik.

The post Vaughan Gardiner sing Uitvlucht se Temalied appeared first on Stage and Screen.