Kaleidoskoop: Gunsteling Seisoen

‘n Album ‘Stukkie vir Stukkie met Hart en Hand aanmekaar Getimmer’

Deur Louw Mulder

Vat nou byvoorbeeld die klanke van Mumford and Sons, asook die Lumineers wat eerskomende maand hier in Suid-Afrika optree, sit ‘n tikkie varsgeskryfde woordkuns en die mooiheid van Afrikaans daarby, en jy kom na aan ‘n beskrywing van Kaleidoskoop se musiek.

Ek was bevoorreg om die bekendstellingsgeleentheid van Kaleidoskoop se nuwe album Gunsteling Seisoen by die Atterbury Teater by te woon. Die gesellige en intieme stemming van die verhoog het absoluut bygedra om definisie aan die musiek op hierdie nuwe album te gee.

“As ek al my vele liefdeslirieke wat uit my hart uit bloei, ongerep kon laat swerwe tot die dag wat jou liefde oor my vloei… As al my woorde alleenlik net oor jou kon spoel, sou dit wees soos wat dit moes, want my woorde is net vir jou bedoel”; so lui die lirieke van die liedjie Dromer, wat een van die snitte op Kaleidoskoop se nuwe album is. Dit is ook ‘n goeie indikasie van die diep, pragtige taalgebruik wat in die gediglirieke van elke liedjie gevind kan word.

Jouba en Anique Jordaan is die twee harmonieuse stemme agter die melodieë van Kaleidoskoop. Saam met die wonderlirieke, is hierdie oud-Maties van Stellenbosch ook verantwoordelik vir die musiek, vervaardiging en verwerking van die eindproduk. Groot name soos Gideon Botes, Jattie de Beer en Ben Ludik is onder andere deel van die skeppers van hierdie album.

Die musiek van Gunsteling Seisoen is liedjies wat praat. Nie net is die stories agter elke snit ‘n verhaal van diepe en goeddeurdunkte verbeeldingswêrelde nie, die musiek agter die musiek is wat hierdie stories lewe gee. Hulle verwys na hulle eie musiek as akoestiese Afrikaanse Folk Pop. Die beste is maar om hierdie album self aan te skaf, en jou eie beskrywende woorde uit te dink.

By die bekendstelling was die verwerkte musiek van die album met deernis gedupliseer, om elke lid in die gehoor ‘n perfekte idee te gee van wat hulle op die CD kan verwag. Daar was van banjo’s en ‘n Ukulele wat van die unieke klanke voltooi het, saam met saksafone, viole en ‘n trekklavier om die oorspronklikheid ten toon te stel.

By hierdie bekendstelling moet ek Gideon Botes en Jason Ferreira uitsonder, wie se snaartalent duidelik bygedra het tot die Kaleidoskoopervaring. Met hierdie vergeet ek glad nie van die ander tien musikante en kunstenaars op die verhoog nie. Elke klank van die musiek was oorspronklik, sonder enige byvoegings van sintetiseerders. Ek dink dit is wat hierdie klanke ‘n beduidende voordeel bo ander hedendaagse musiek gee.

Gehore by die drie bekendstellingskonserte was nie net geseënd met die nuwe skeppings van Gunsteling Seisoen nie, maar ook deur Kaleidoskoop se eie weergawes van Brandi Carlile se The Story, Michael Jackson se Billie Jean, en Zombie van die Cranberries, wat op hulle Acoustic Covers album gesny is. Persoonlike gunstelinge vir die aand was hulle eie weergawe van Pinocchio, asook die snit Moedersmelk van die album Platsak, waar die verwerking tussen kitare en perkussie vir egte Suid Afrikaanse hoendervleis gesorg het.

In 2012 moes Kaleidoskoop hulle kabinette afstof om plek te maak vir die Tempo Toekenning vir Beste Kontemporêre album van die jaar.  Nog vroeg om die sukses van Gunsteling Seisoen te voorspel, maar net die beste kan verwag word van hierdie album.

Die liedjie Vlugvoetig is my persoonlike gunsteling, en ‘n briljante keuse as die openingsnit op hierdie album. Al Kaleidoskoop se musiek, asook Gunsteling Seisoen, kan aanlyn gekoop word by http://kaleidomusiek.co.za/

Vanaf hulle nuwe album, is die eerste enkelsnit wat vroeër uitgereik is, met die naam Wegbreek. Hierdie liedjie is geskryf in samewerking met Christiaan Kritzinger, en die video, as ‘n Kaleido-lusmaker, is hieronder!