Twee vir die Prys van Een

’n Komedie met baie draaie en swaaie…

Dis amper tyd vir ’n lekker volwasse komedie, met baie kinkels…

Twee vir die prys van een is ’n slimsnaakse, vars, uitbundige komedie met onverwagse wendings; geskryf deur die bekende Britse dramaturg Donald Churchill. Die stuk is in Afrikaans vertaal deur Wim Vorster.

In die rolverdeling is Hannes Muller (Groet die grotman), Lizz Meiring (Cheaper than Roses, Molly en Wors) en Michelle Botha (Getroud met rugby).

Die regisseur is Neels Clasen (Binnelanders, Belade vir ’n banggat).

In dié stuk ontmoet die gehoor vir Walter (Hannes Muller) wat as verwer by ’n deftige huis opdaag om die studeerkamer van ’n belangrike sakeman te verf. Walter is eintlik ’n sukkelende, maar besonder ambisieuse akteur wat die pot aan die kook hou met sy verfwerk.

Mercia (Lizz Meiring) is die sakeman se pretensieuse en hoogheilige vrou wat haar in ’n penarie bevind wanneer Janie (Michelle Botha), haar skelm minnaar se vurige vrou, opdaag en dreig om hul affair oop te vlek. Janie dreig om Mercia se man te vertel van sy vrou se agterbakse verhouding. Mercia sal egter alles doen om te verhoed dat die saak op die lappe kom.

Walter word natuurlik betrek – met skreeusnaakse en verrassende gevolge. Jy kan uitsien na ’n lekker lag komedie, uit die mond van gesoute akteurs.

Twee vir die prys van een is te sien van 10 Junie tot 12 Julie in Pieter Toerien se Montecasino-teater in Fourways en van 15 Julie tot 26 Julie by Pieter Toerien se Theatre on the Bay in Kaapstad.

Kaartjies kos van R130 tot R165 en is beskikbaar by Computicket.

Twee vir die prys van een is ’n trotse Kosie House of Theatre produksie.