Stage and Screen Stage and Screen is an online publication offering the latest Entertainment news of Productions on Stage, and on Screens.
Die lokprent vir die langverwagte erfenisrolprent, Poppie Nongena, is amptelik uitgereik. Die fliek, met sy wortels stewig geanker in die Suid-Afrikaanse geskiedenis, is met twaalf toekennings bekroon by die onlangse kykNET Silwerskermrolprentfees. Dit is gegrond op Elsa Joubert se roman Die swerfjare van Poppie Nongena, en word op 31 Januarie 2020 landswyd in rolprentteaters vrygestel.
Poppie Nongena vertel die verhaal van ‘n Afrikaans sprekend Xhosa ma se stryd om stabiliteit vir haar gesin te verseker in ‘n tydperk van buitengewone onrus in Suid-Afrika. Dis ‘n era waarin swart vroue deur arrestasies, boetes en gedwonge verwyderings hulle huise moes verlaat om in afgeleë gebiede, die sg. “swart tuislande”, te gaan hervestig. Wanneer haar man, Stone, te siek word om te werk, word Poppie volgens die wet beskou as ‘n “onwettige” inwoner in haar eie land.
Clementine Mosimane, wat die hoofrol vertolk en aangewys is as beste aktrise tydens die Silwerskermfees, voel dat die fliek ‘n belangrike boodskap oordra. Die aktrise Anna-Mart van der Merwe, wat ook in die rolprent te sien is, stem saam. “Die plaag van geslagsgeweld skreeu ten hemele! Dis tyd dat ons ook na ons eie optrede teenoor mense met wie ons daagliks interaksie het, kyk. Omhels en aanvaar ek ander soos wat ek wil hê hulle moet met my doen?” het Van der Merwe gesê.
Poppie Nongena is ‘n diep persoonlike verhaal wat uit ‘n vroue perspektief vertel word. Die kinematograaf Vicci Turpin voel sterk oor die dringendheid rondom vroueregte in Suid-Afrika. Helena Spring het haarself daartoe verbind om ‘n verskil te maak.
Clementime Mosimane speel die rol van Poppie, met Anna-Mart van der Merwe, veteraan Chris, Rolanda Marais, Dawid Minnaar en Lida Botha. Nomsa Nene wat wyd geloof is vir haar uitstekende vertolking van Poppie in die internasionale verhoogproduksie, speel die rol van Poppie se ma.
Die bekroonde draaiboekskrywer en regisseur Christiaan Olwagen se vorige werk sluit die hoogs aangeskrewe rolprente Johnny is nie dood nie, Die Seemeeu en Kanarie in.
Joubert se roman, wat beskou is as baanbrekerswerk, is drie maal herdruk binne die eerste vier maande na publikasie, en is sedertdien in dertien tale vertaal. Dis met talle plaaslike en internasionale toekennings bekroon.
Poppie Nongena is vervaardig met die ondersteuning van KykNET, M-Net, Marche Media, die Departement van Handel en Nywerheid en Arco Venture Capital.
Die roman was op 15 Oktober 2019 hervrygestel in beide Afrikaans en Engels ter viering van die rolprent se bekendstelling.
